А генваря в 3 день послал царь и великий князь из слободы ко отцу своему и богомолцу к Офонасию, митрополиту всея Русии, с Константином Дмириевым сыном Поливанова с товарищи, да список, а в нем писаны измены боярские и воеводские и всяких приказных людей, которые они измены делали и убытки государьству его, до его государьского возрасту, после отца его, блаженые памяти великого государя царя и великого князя Василия Ивановича всея Русии; и царь и великий князь гнев свой положил на своих богомолцев на архиепископов, и епископов, и на архимандридов, и на игуменов, и на бояре своих, и на дворецкого и конюшего и на околничих, и на казначеев, и на дьяков, и на детей боярских, и на всех приказных людей, опалу свою положил в том: после отца его блаженные памяти великого государя Василия, при его государстве, в его государьские несовершенные лета. бояре и все приказные люди его государства людем многие убытки делали и казны его государьские тощили, а прибытков его казне государьской никоторой ни прибавляли. также бояре его и воеводы земли его государские себе розоимали и другом своим, племени его государьские земли роздавали и держачи за собою бояре и воеводы помесья и вотчины великия, а жалования государьские кормленые емлючи, и собрав себе великие богатства, и о государе и о его государьстве и о все православном християнстве не хотя радети, и от недругов его от Крымского и от Литовского и от Немец не хотя крестианства обороняти, наипаче же крестьяном насилие чинити, и сами от службы учали удалятися, и за православных крестиян кровопролите против безсермен и против Латын и Немец стояти не похотели; и в чем он государь бояре своих и всех приказных людей, также и служилых князей и детей боярских похочет которых в их винах понаказати и посмотрити, и архиепископы и епископы и архимандриды и игумены, сложась с бояры и с дворяны и с дьяки и со всеми приказными людми, почали по них же государю царю и великому князю покрывати. И царь и государь великий князь, от великие жалости сердца, не хотя их многих изменных дел терпети, оставил свое государство и поехал, где вселитися, идеже его государя бог наставит. К гостем же и к купцом и ко всему православному крестианству града Москвы царь и великий князь прислал грамоту с Костянтином Поливановым, а велел перед гостьми и перед всеми людьми ту грамоту прочести, дьяком Путилу Михайлову и Ондрею Васильеву; а в грамоте своей к ним писал, чтобы они никоторого сумления не держали, гневу на них и опалы никоторые нет.
