Демалыста (мезгіл үстеулерін қолданумен)
Көптен күткен жаз мезгілімен қоса жазғы демалыс та келіп жетті. Төрт тоқсан бойы сабақ оқыған мектеп оқушылары асығыспен күтетін бұл мезгіл небір қызықты оқиғаларға толы болады ғой. Биыл менің жазғы демалысым өте қызықты өтті. Жылдағы әдетім бойынша демалыс басталысымен мен нағашы атам мен әжеме ауылға бардым. Таңертең ерте тұрып, жайлауға мал жаюға көмектестім. Күні бойы әжемнің дайындаған құрт, май, ірімшік пен қаймағын жеп, қолдың сүтін ішіп, біраз күш жинадым. Ауылдағы достарыммен күнде кешкісін футбол ойнадық. Осылай бір ай уақытым зымырап өтіп кетті.
Ауылдан қайтып келген соң, мен жазғы лагерьге демалуға бардым. Ондағы өткізген әрбір күн өз ерекшелігімен есте қалды. Күнделікті түрлі - түрлі сайыстар өткізіліп, біз барлығына белсене қатысып, жүлделі орындарға да ие болдық. Ол жерде көп балалармен танысып, жаңа достар таптым.
Лагерьден қайтып үйге келген соң, отбасымызбен шетелге қыдыруға бардық. Бұрын шетелге шықпағандықтан, бұл менің ұшаққа алғаш мінуім еді. Біз онда күні бойы қыдырып, түрлі мұражайларға бардық, саябақтарда серуендеп, мұхитта суға түстік.
Биылғы жазғы демалысым өзіме қатты ұнады. Жаңа оқу жылына біраз күш жинап, өте жақсы демалдым.
Алғашқы қар.
Сиқыршы қыс та келіп жетті. Күн аяздатып, көптен күткен алғашқы қар да жауды. Қар аппақ әрі мамық. Қолыңа тисе еріп кете барады. Қар түйіршектері алыстан қарасаң жай кішкентай ғана дөңгелектер секілді. Ал жақыннан қарасаң небір пішіндері бар екенін аңғарасың.
Қар толастамай жауған соң, ол күн көзіне шағылысып көзді ауыртады. Ал жүрсең аяқ астынан "қырт-қырт" еткен дыбыстар шығады. Айналаны бейне бір қардан жасалған көрпе көмкерген секілді.
Жіктелуі жалғауы жалғанған сөздер: кете барады, қарасаң, аңғарасың, ауыртады, шығады.
