2-тапсырма. Берілген мәтінді мұқият оқыңыз. Мәтіннен ерекше ой салған немесе әсер еткен ақпаратты жазып, себебін түсіндіріңіз. Диетолог –маманға хат жазыңыз немесе өзіңізді толғандырған сұрақты қойыңыз. Мәтіндегі шылау түрлерін анықтаңыз.

Адамзат денсаулығын сақтаудың басты шарты – дұрыс тамақтану. Сондықтан тамақтануға ерекше көңіл бөлген жөн. Тамақ құрамының құндылығы басты назарда болғаны дұрыс. Тиімді, дұрыс тамақтану денсаулықты сақтауға, ағзаның қалыпты өсуі мен дамуына, жұмыс қабілетінің жоғарылауына ықпалын тигізеді.

Ас-адамның арқауы, ағза дене жүктемесінде ғана емес, тыныштық жағдайында да шығындайтын қуат көзі. Ас ішу біздің жасушаларымыз бен тіндерімізді жаңартуға мүмкіндік береді. Дұрыс тамақтану жүрек-қантамыр, асқазан-ішек жолдары, қант диабеті сияқты аурулардың алдын алу үшін, сыртқы орта әсеріне қарсы тұру үшін, ағзаның жұмысқа қабілеттілігін арттыру үшін, белсенді ұзақ өмір сүру үшін қажет. Салауатты тамақтану және жоғары дене белсенділігі, спорт пен шұғылдану, күйзеліс пен күресе білу, темекіден, ішімдіктен бас тарту арқылы салауатты өмір салтын ұстану арқылы аурулардың алдын алуға болады.

Сонымен қатар, кешкі 6-дан кейін тамақтанбаған дұрыс. Бұл ешкімге де жаңалық емес, алайда біз осы жайды жиі естен шығарамыз. Диетолог мамандар бұл заңды арықтаудың алтын ережесі деп атайды. Қарбалас заманда бұл ережені ұстану өте қиын. Көбіміздің басты тағамымыз кешкі ас болып табылады. Сондықтан бұл ережені ұстанамын десеңіз, сіз толыққанды таңғы ас пен түскі ас ішуіңіз керек. Кешкі сағат 6-ға дейін тамақтанып үлгермесеңіз, ұйықтағанға дейін 3-4 сағат бұрын тамақтанып үлгеріңіз. Әрине, күнделікті рационның жартысынан көп бөлігін күннің бірінші жартысында жеу керек, ал кешке жеңіл, майсыз тағамдарды таңдаңыз. Сіздің денсаулығыңыз - өз қолыңызда.

Мәтіннен ерекше ой салған немесе әсер еткен ақпаратты жазыңыз. Жеке түсінік беру: осы дәйексөзді (ақпаратты) жазуға не мәжбүр етті? Сізге қандай ой салды? Диетолог-мамандарға хат немесе сізді толғандырған сұрақ.