1836-38 жылдары Батыс Қазақстанда болған халық көтерілісінің саяси көсемі, қайсар қолбасшысы, халық батыры, Жоңғар шапқыншылығы кезінде атағы шыққан Ағатай батырдың ұрпағы Исатай Тайманұлының (1791-1838) туғанына биыл 230 жыл толды. Қас батыр, қолбасшының ажал құшқаны 1838 жыл болса, елдің сорпа бетіне шыққандарын құрту саясаты толассыз жүз жыл жүріліп, ақыры 1938 жылы Алаш ардақтыларының кеудесін мезгілсіз оққа тосқанын еске аламыз.
Елдің есе-теңдігі жолында өзінің жанын, жарын, жақынын, туған балаларын құрбан еткен Исатай батыр туралы жазба деректер көп. Өмір тарихына қарап отырсақ, Петербордың назарын аударып, мазасын алған айбоз ер туралы патша үкіметінен қалған құжаттар да мол секілді. Ал, қорында 22 мың қолжазба сақталған Орталық ғылыми кітапханада Исатай Тайманұлы туралы халық арасында сақталған қолжазбалар баршылық. Атап айтқанда, халық арасынан жиналып, сирек кітаптар және қолжазбалар қорына сақталып қалған аса құнды жазба мұралардан төте жазу, латын әліпбиі, қазіргі қазақ жазуында хатқа түскен 18 қолжазба бар
