Ауызсу мәселесі бүгінде әлемнің көптеген елдерін толғандырып отырғаны белгілі. Мамандардың болжамы бойынша, ауызсу мемлекетаралық, еларалық маңызды мәселе ретінде алдағы уақытта да өзінің өзектілігін жойған емес. Өйткені су – тіршілік көзі. Өмірдің нәрі де, сәні де су. Сондықтан бұл мәселені алдын ала шешуді қолға алған елдер ғана болашақта табысты болмақ. Қазақстан жағдайына келетін болсақ, әрине, біздің елімізде де ауызсу мәселесі туындап отырған жоқ деп айта алмаймыз. Ол республикамыздың әр өңірінде кезігетін мәселе. Оны шешу үшін Елбасының тапсырмасына орай «Ақ бұлақ» бағдарламасы қабылданды.
Бұл кешенді бағдарлама, халықтың игілігіне жұмыс істейтін бағдарлама. Ал халықтың игілігі неде? Экономикалық, әлеуметтік салалардың барлығы да ауызсу мәселесімен тығыз байланысты. Демек, ауызсуға көңіл бөлу, оны әрбір өңірдің стратегиялық мәселесіне айналдыру бүгінгі күннің еншісіндегі дүние.
